Að póstleggja bréf og barn

Samstarfspósthúsinu í Hveragerði var skellt í lás 31. ágúst 2023.

Maður hefur póstlagt hitt og þetta í gegnum tíðina og það var oft hátíðleg stund þegar maður póstlagði handskrifuð bréf vitandi það að innan tíðar myndi tiltekin manneskja handleika þau, lesa og jafnvel skynja eitthvað óvenjulegt í gegnum rithöndina og málfarið.

Nú er öldin önnur, pósthús og handskrifuð bréf eru orðin býsna sjaldgæf og ákveðinn skapandi tjáningarmáti í leiðinni.

En fyrir hundrað árum þótti eðlilegt að póstleggja pakka, bréf, dýr, líkkistur, skotvopn og börn.

Fyrsta skráða tilvikið þar sem barn var sent með pakkapósti var í janúar 1913.

Herra og frú Jesse Beagle frá Glen Este, Ohio sendu þá son sinn, James, í pósti til ömmu sinnar. James komst klakklaust á áfangastað.

Frímerkið kostaði heil 13 sent og vegalengdin var nokkrir kílómetrar. 

Á meðfylgjandi ljósmynd má sjá tvo reffilega póstburðarmenn með barnapakkapóst.