Sjálfuprik og sveitarómans

 

Við sjáum hér ábúðarfullan herramann munda sjálfuprik í dáfallegu landslagi um aldamótin 1900.

Í forgrunni má sjá tvær hefðardömur sem leiðist kannski þófið enda tók þessi sjálfa sjálfsagt óratíma í framkvæmd. 

Kunnáttumenn segja að nútímamaðurinn um gervallan heim taki um 60.000 ljósmyndir á hverri sekúndu.

Það gera um 1.810.000.000.000.000.000 á ári. 

 

Rafskútuparið

 

Hér í forgrunni má sjá glaðhlakkalegt prúðbúið par á rafskútu. 

Þetta er 102 ára gömul ljósmynd vel að merkja.

Síðan hefur auðvitað mikið vatn runnið til sjávar í menningu vorri.

Líkamsstaða náungans í bakgrunninum vinstra megin segir þó meira en mörg orð. 

Að brýna kuta liggjandi á maganum

 

 

Snemma á síðustu öld í Thiers-borg, Frakklandi, brýndu menn og konur sveðjur, kuta, sverð og hnífa, liggjandi á maganum helst með hund flatmagandi á fótleggjum sínum.

Menn og konur sinntu ýmis konar landbúnaðarstörfum á sumrin svona eins og gengur og gerist og smíðuðu og brýndu hnífa á veturna við erfiðar aðstæður svo ekki sé dýpra í árinni tekið.

Kalt var innandyra og hverfisteinninn gat verið víðsjárverður og vinnan sjálf var mjög líkamlega krefjandi og endurtekningarsöm. Því var brugðið á það ráð að vinna liggjandi á maganum til að hlífa bakinu og nota hunda til að halda á sér hita eftir fremsta megni.

Þessar gömlu ljósmyndir opna glugga inn í fjarlægan heim og einkennilegar aðstæður.

Það hvarflar þó ekki að manni í febrúarmánuði á því herrans ári 2025 að liggja á maganum í vinnunni og brýna sigður eða eggjárn í fimbulkulda með hund ofan á sér.

Og þó...